Friday , June 21 2024

Kailangan ng ahensiya na hiwalay sa Comelec

KAHAPON pa lang ang simula ng opisyal at 90-araw na campaign pe­riod para sa mga bago at reeleksiyonistang kan­didato sa Senado kahit ang iba, sa totoo lang, ay mahigit isang-taon nang kumakam­panya.

Muli tayong makari­rinig ng mga nakakiki­labot at makatindig-bala­hibong talumpati mula sa mga kandidato na mag­papaligsahan sa pagsa­salita para makahakot ng mapabibilib na botante.

Uso na naman ang panunuyo, ang pambobola na may kasamang payakap-yakap, pahalik-halik at patapik-tapik sa balikat ng mga botante na dati nang modus ng mga kandidato tuwing may halalan.

Siyempre, sa lahat ay hindi mawawala ang vote-buying na pinakamabisang pambulag ng mga walanghiyang kandidato na nakasalalay ang panalo sa pamimili ng boto.

At ang masaklap ay may malaking krisis sa kredibilidad ang Commission on Elections (Comelec) na gampanan ang kanilang mandato na mairaos ang maayos na halalan sa bansa.

Inutil at walang silbi ang Comelec sa mga tahasang paglabag at harap-harapang pandaraya sa mga batas ng eleksiyon.

Pagdating sa mga protesta, nag-uumpisa na ang kasunod na eleksiyon at hindi pa natatapos ang mga kaso na idinulog sa kanila sa mas naunang halalan.

Walang katiyakan na totoo pa ang mga resulta ng halalan dahil ang pagbilang sa sagradong boto ng mamamayan ay nakasalalay sa manipulasyon ng Smartmatic na kakontrata ng Comelec.

Mas angkop sa kultura natin ang makalumang manual counting na dating paraan sa eleksiyon, matagal man ang resulta ay sa atin dapat ipaubaya ang pag­bilang ng ating mga boto.

Napakawalang sentido-kumon naman yata na tayo ang pumili ng ating ibinoto, pagkatapos ay sa mga dayuhan manggagaling ang resulta ng nanalo sa eleksiyon. Simple lang ang naman ang kailangang reporma para maisaayos ang prose­so ng halalan sa kung ‘di ang pagbawas sa ibang mandato ng Comelec na hindi nila kayang gampanan.

Nangangailangan ang pagtatatag ng hiwalay na tanggapan para sa registration ng mga botante na hahawak din sa mga protesta at mga kasong may kinalaman sa eleksiyon.

Ang panibagong ahensiya ang hayaang mamahala sa registration ng mga botante na pagdudulugan din ng mga kasong may kinalaman sa eleksiyon.

Kung tutuusin, hindi ang mga kandidato na nadedeklarang nuisance kung ‘di Comelec mismo ang talagang nagpapagulo sa proseso ng eleksiyon dahil sa pagpapatupad ng mga tuntunin na wala namang basehan sa batas.

Naturalmente, ‘pag may gulo at kalitohan sa mga batas, may kikita!

Kagagagohan na rin na mabaliktad pa sa Comelec ang anomang apela at reconsideration sa mga protesta at kaso na kanilang nade­si­syonan.

Tanggalin na rin ang Comelec ng poder na makapasok sa anomang kontrata at kasunduan na may kaugnayan sa proseso ng eleksiyon.

May pag-asa pang tumino ang halalan at maipatupad ang elction laws kung lilimitahan ang mandato ng Comelec sa pagbilang ng mga boto para pati sila ay mapanagot din sa batas sakaling masangkot sa kalokohan.

(Para sa anumang sumbong at reaksiyon, mag-text o tumawag sa 09166240313. Maaring ipadala ang inyong liham sa e-mail address: [email protected])

KALAMPAG
ni Percy Lapid

About Percy Lapid

Check Also

Sipat Mat Vicencio

Dapat bang suportahan ni Digong si Imee sa halalan 2025?

SIPATni Mat Vicencio SILIP NA SILIP ang diskarte ni Senator Imee Marcos at halatang ginagamit …

FIRING LINE ni Robert B. Roque, Jr.

Ang ‘mischievous’ na misis ng Pangulo

FIRING LINEni Robert B. Roque, Jr. BAGO mag-weekend, isang pahayag kontra kontrobersiya ang umalingawngaw mula …

Sipat Mat Vicencio

Dapat lang sibakin si Migz

SIPATni Mat Vicencio WALANG ibang dapat na sisihin sa pagkakasibak ni Senator Juan Miguel “Migz” …

FIRING LINE ni Robert B. Roque, Jr.

General lie

FIRING LINEni Robert B. Roque, Jr. PINAKAWALAN sa Shangri-La Dialogue ng pinakamatataas na opisyal ng …

AKSYON AGAD ni Almar Danguilan

Pananakit ng grupong MANIBELA kay Gonzales, kinondena ng QCPDPC

AKSYON AGADni Almar Danguilan NAKALULUNGKOT ang balita o nangyari kahapon sa kapatid namin sa pamamahayag …

Leave a Reply

Your email address will not be published. Required fields are marked *