ARESTADO ang apat katao kabilang ang isang menor-de-edad na 17-anyos matapos mahulihan ng mga pulis ng marijuana sa Malabon City, kahapon ng madaling araw.
Kinilala ni S/Insp. Ronald Carlos ang mga naarestong suspek na sina Danrey Kenneth Potolin, 21-anyos, ng Taguig City; Niel Mitchel Piguing, 18-anyos ng Navotas City; Francis John Gallardo, 19-anyos, ng Brgy. Baritan; at ang 17-anyos na binatilyo, sinabing nakatira Brgy. San Agustin, Malabon.
Batay sa ulat ni PO3 Jun Belbes, dakong 3:00 am, nagpapatrolya ang mga tauhan ng Malabon Police Community Precinct (PCP) 6 sa kahabaan ng Nibungco St., San Agustin nang isang concerned citizen ang lumapit at ipaalam sa kanila ang hinggil sa grupo ng indibiduwal na humihitit umano ng marijuana.
Mabilis na nagresponde ang mga pulis sa naturang lugar at nakita ang mga suspek na magkahaharap habang abala sa pagbusisi ng apat na plastic sachets na naglalaman ng hinihinalang pinatuyong dahon ng marijuana.
Sinampahan ng pulisya ang mga suspek ng kasong paglabag sa RA 9165 sa Malabon City Prosecutor’s Office habang dinala sa pangangalaga ng DSWD ang 17-anyos menor-de-edad. (ROMMEL SALES)
