HINDI para sa persons with disabilities (PWDs), senior citizens at mga buntis ang napakataas na footbridge sa EDSA-Kamuning sa Quezon City kundi sa mga able-bodied pedestrians, ayon sa Metropolitan Manila Development Authority (MMDA).
Inihayag ito ni MMDA General Manager Jose Arturo “Jojo” Garcia Jr., makaraan mag-viral sa social media ang retrato ng footbridge at binira ng ilang netizens ang sobrang taas na footbridge na ‘inconvenient’ sa persons with disabilities (PWDs), senior citizens at mga buntis.
Dagdag ng opisyal, ginawa ang naturang footbridge dahil sa ilang aksidente na kinasangkutan ng mga pedestrian na tumatawid sa EDSA.
“We need to know the purpose for the design of the footbridge. Sa lugar na ‘yan marami nang aksidente, tumatawid ang tao pumupunta sa ilalim. Ang daming nahoholdap diyan. Kaya naman inilagay ‘yan para may option ang tao kaysa makipagpatintero sa mga kotse at kay kamatayan, may footbridge riyan,” pahayag ni Garcia.
Ang pangunahing layunin aniya kung bakit itinayo ang naturang footbridge ay para sa kaligtasan ng mga tumatawid na pedestrian.
“The main purpose of the footbridge is for people to safely cross on the other side of the street. The footbridge provides maximum comfort for pedestrians,” ayon kay Garcia.
Nabatid na ang naturang steel footbridge ay ginawa sa EDSA-Kamuning, na may siyam metro na mas mataas sa power lines ng MRT-3. Nasa P10 milyon ang budget sa pagpapagawa ng footbridge at plano itong lagyan ng escalator, at inaasahang matatapos sa 15 Nobyembre 2018. (JAJA GARCIA)
