HATAW! D'yaryo ng Bayan hatawtabloid.com
ARESTADO sa mga operatiba ng Philippine National Police Anti-Cybercrime Group ang walong Israeli at 482 Filipino sa Clark Freeport Zone sa Angeles City, Pampanga dahil sa umano’y panloloko ng multi-milyong dolyar sa mga biktima sa online stock trading scam.
Ang walong Israeli, at 232 lalaki at 242 babaeng Filipino ay nadakip sa sabay-sabay na operasyon nitong Martes ng umaga sa tatlong departments ng International Brandings Development Marketing, Inc. (IBD) sa Clark Freeport Zone, na kinaroroonan ng umano’y “boiler room” ng mga suspek.
Sinabi ni PNP-ACG head, C/Supt. Marni Marcos, Jr., ang mga suspek, sinasabing nag-o-operate bilang call center, ay nanloko ng mga biktima sa nakaraang dalawang taon at kalahati.
“Their modus operandi is like a stock trading scam, meaning they invite investors through online. So again after that they will get details of your bank accounts, credit cards,” ayon sa Marcos.
Ang Filipino suspects ay nadakip sa aktong nakikipag-ugnayan at nagsasagawa ng online transaction sa foreign ‘clients’ mula sa Europe, New Zealand, Australia, South Africa at Russia,” ayon kay PNP chief, Director General Oscar Albayalde.
Ang operasyon ay nag-ugat sa mga reklamo ng Australian victims na sina Jan Theresa Bedggood, Robery Wayne Smith, Juningsih Welford at South African Barend Nichloaas Prinsloo, nagsabing sila ay nabiktima ng sinasabing online trading scam.
Ang mga suspek ay nakakukuha ng mahigit US$1-milyon kada araw mula sa kanilang foreign victims.
Kompiskado mula sa mga suspek ang ilang piraso ng digital evidence na ginagamit sa pagsasagawa ng cybercrime, karamihan ay computers, identifications cards, at iba’t ibang documentary evidence, na nagpatibay sa alegasyon ng online fraud engagement laban sa IDB.
“Furthermore, during the search, the accounts of the complainants were extracted from the Quality Assurance and Customer Service in Building 1 strengthening the allegation imputed against IBD to be involved in a fraudulent online trading,” ayon kay Albayalde.
