HATAW! D'yaryo ng Bayan hatawtabloid.com
ARESTADO sa mga tauhan ng Northern Police District (NPD) ang isang preso, may kasong possession of illegal drugs, na natakasan ang duty desk officer kamakailan.
Balik-selda ang suspek na kinilalang si Leonardo Retiro, Jr., residente sa Dulong Herrera St., Brgy. Ibaba, Malabon City, na nahaharap sa kasong paglabag sa possession of illegal drugs o Section 11 ng R.A. 9165.
Ayon kay District Special Operation Unit (DSOU) S/Insp. Robert Bunayog, dakong 3:00 pm, nang kanilang arestohin si Retiro habang sakay ng DLTB bus patungong Daet, Camarines Norte sa Turbina bus station, Brgy. Turbina, Calamba City, Laguna.
Matatandaan, 19 Mayo, habang si PO3 Ernesto Estrellas Jr., ang duty desk officer ng DSOU, pinayagan niya si Retiro na makalabas ng selda dakong 9:30 am nang dumaing ng pananakit ng tiyan.
Pinayagan ng pulis si Retiro na humiga sa isang upuan sa labas ng kanyang selda para mabigyan ng kaginhawaan habang hinihintay ang kanyang kasama na magdadala sa kanya sa pinakamalapit na ospital upang mabigyan ng medikal na atensiyon.
Makalipas ang ilang sandali, humingi si Retiro kay Estrella ng isang basong tubig ngunit pagtalikod ng pulis ay tumakas ang preso.
(ROMMEL SALES)
