PATAY ang isang 51-anyos latero makaraan mahulog habang kinukumpuni ang bubong ng bodega ng isang paper company sa Valenzuela City, kamakalawa ng hapon.
Hindi umabot nang buhay sa Valenzuela City Medical Center ang biktimang si Bonifacio Plantinos, residente sa Northwind, San Jose Del Monte City, Bulacan sanhi ng mga pinsala sa ulo at katawan.
Sa ulat kay Valenzuela police chief, S/Supt. Ronaldo Mendoza, dakong 2:00 pm nang mangyari ang insidente sa Vanhawk Paper Philippine Company sa 6400 Tatalon St., Brgy. Ugong ng nasabing lungsod.
Napag-alaman, habang nagtatrabaho ay nakatapak ang biktima sa kalawanging parte ng bubong kaya lumusot at nahulog mula sa 30 talampakang taas.
Dinala ang bangkay ng biktima sa PNP Crime Laboratory para sa autopsy examination habang nagsasagawa ng follow-up investigation ang pulisya upang mabatid ang pananagutan ng may-ari ng kompanya. (ROMMEL SALES)
