PATAY ang tatlo katao habang lima ang nasa kritikal na kalagayan sa pagamutan makaraan magkarambola ang apat sasakyan sa bayan ng Argao sa lalawigan ng Cebu, nitong Linggo.
Kabilang sa sangkot sa karambola dakong 10:30 am sa Brgy. Taloot, ang kotse, SUV, trailer truck, at multi-cab.
Ayon sa ulat, nahulog sa gilid ng highway at bumaliktad ang trailer truck.
Mabilis na nagresponde ang mga tauhan ng Disaster Risk Reduction and Management Office ng Argao, ngunit pahirapan ang pagsagip sa mga sugatan dahil naipit sila sa nagkayupi-yuping sasakyan.
Agad binawian ng buhay sa insidente ang isang 4-anyos biktima, habang sa ospital namatay ang dalawang iba pa.
Ang limang sugatan ay nasa kritikal na kondisyon sa magkakahiwalay na mga pagamutan sa Cebu.
Masusing iniimbestigahan ng pulisya ang insidente.
