NAPUTOL ang kaliwang binti ng isang road safety volunteer makaraan mahagip ng isang pampasaherong bus habang sakay ng motorsiklo sa Gumaca, Quezon, nitong Linggo.
Ayon sa ulat, nakatawag pa sa kanyang mga kapwa Ligtas SumVac (summer vacation) volunteers ang biktima gamit ang hawak na handheld radio makaraan siyang mahagip ng Raymond Trans bus, na may body number na 9418, sa bahagi ng Maharlika Highway sa Brgy. Hagak-hakin nitong madaling-araw ng Linggo.
Sa mga retrato mula sa Gumaca Municipal Disaster Risk Reduction and Management Office (MDRRMO), kitang naputol ang buto ng biktima sa kanyang kaliwang binti.
May iba pang sugat ang biktima sa ibang parte ng kanyang katawan.
Ayon sa MDRRMO, papauwi ang biktima nang mahagip ng bus. Hindi pa inihahayag ang pangalan ng SumVac volunteer.
Habang nasa kustodya na ng lokal na pulisya ang driver ng bus.
Napag-alaman na handa umanong makipagtulungan ang may-ari ng Raymond Trans sa biktima.
