WINNER ang pilot episode ng Sana Dalawa Ang Puso nitong Lunes dahil trending kaagad bukod pa sa inilampaso nito sa ratings game ang katapat na programa sa GMA 7, 19.9% vs 6.1%.
Ang mga kababayan nating nasa ibang bansa ay naka-live streaming kasama na ang mga pinsan namin na Salonga family.
Sabi sa amin ni Rowena Salonga na simula noong natapos ang Be Careful with My Heart ay naging malulungkutin na ang Lola Lilia Salonga, 88, dahil hindi na niya napanonood ang Jo-Chard loveteam na tanging libangan niya kapag naiiwan sa bahay dahil pumapasok sa trabaho ang mga anak.
Kaya naman ang saya-saya ng lola namin sa pagbabalik ng Jo-Chard kasama pa si Robin Padilla sa Sana Dalawa Ang Puso na talagang inabangan nila noong Lunes, “Grabe ‘cuz hahaha ‘di mahintay ni mama ‘yung S2P IPTV pinilit niyang panoorin sa TFC TV ang saya-saya niya, tuwang-tuwang mapanood ulit si Jodi at Richard. Lahat kami nakatutok sa live streaming,” kuwento ng pinsan naming si Rowena.
FACT SHEET
ni Reggee Bonoan
