PATAY ang dalawang hinihinalang karnaper makaraan makipagbarilan sa mga operatiba ng Quezon City Police District (QCPD) La loma Police Station 1, nang isilbi ang warrant of arrest laban sa mga suspek sa Brgy. Manresa, Quezon City, kahapon.
Sa ulat ni Supt. Ro-berto Sales, La Loma PS 1 chief, kay QCPD director, C/Supt. Guillermo Lorenzo T. Eleazar, kinilala ang mga suspek na sina Wilson Nakpil at Ferdinand Chiuco, kapwa ng Mauban St., Brgy. Manresa.
Ayon kay Supt. Sales, dakong 2:00 pm nang isilbi ng kanyang mga tauhan ang arrest warrant laban sa dalawang suspek sa kasong theft sa bahay ni Nakpil sa Block 2, Lot 13, Mauban St.
Ngunit imbes sumuko sina Nakpil at Chiuco, pinaputukan nila ang mga operatiba habang papalapit sa bahay ni Nakpil dahilan para gumanti ang tropa ng PS 1, nagresulta sa pagkamatay ng dalawang suspek.
Narekober ng mga awtoridad ang dalawang kalibre .38 baril, at spare parts ng mga nakaw na motorsiklo.
May natagpuan ding dalawang sachet ng shabu mula sa mga suspek. (ALMAR DANGUILAN)
