KRITIKAL ang kalaga-yan ng isang 4th year college student makaraan martilyohin ng isang lalaking lango sa droga habang sugatan ang isang janitress at kanyang 4-anyos anak na sinaksak ng suspek sa Navotas City kahapon ng madaling araw.
Nilalapatan ng lunas sa Tondo Medical Center ang estudyanteng si Kim Xialen Villaseñor, 20, residente ng 314-B S. Roldan St., at ang mag-inang sina Romina dela Cruz, 30, at Angelo, 4-anyos, ng 340 S. Roldan St., Brgy. Tangos.
Sa imbestigasyon ni PO2 Paul Roma, dakong 1:40 am habang naglalaro ng gadget sa labas ng kanilang bahay si Villaseñor nang bigla siyang hatawin ng martilyo ng suspek.
Pagkaraan ay mabilis na tumakbo ang suspek sa loob ng bahay ng mag-inang Dela Cruz at kapwa sila sinaksak.
Patuloy na tinutugis ng mga awtoridad ang tumakas na suspek.
(ROMMEL SALES)
