DALAWANG lalaking hinihinalang sangkot sa droga ang patay, kabilang ang dating police asset, nang pagbabarilin ng grupo ng kalalakihang naka-bonnet habang sugatan ang isang lolo na tinamaan ng bala sa magkahiwalay na insidente sa mga lungsod ng Muntinlupa at Las Piñas nitong Miyerkoles ng gabi.
Ayon sa ulat ng Muntinlupa City Police, dakong 11:30 pm nang pagbabarilin ng limang lalaking lulan ng tatlong motorsiklo ang biktimang si Ronel Longhas, 35, dating police asset, sa loob ng kanyang bahay sa Phase 1, Block 2, NHA, Brgy. Poblacion ng lungsod.
Habang bandang 10:00 pm nang pagbabarilin ng isang grupo ng armadong lalaki si Pethrus Cuizon, 29, ng 5 Dahlia St., Phase 1, Brgy. CAA, Las Piñas City, habang naglalakad sa Daffodil St., Phase 1 ng nabanggit na barangay.
Minalas na tinamaan ng ligaw na bala sa insidente si Bonifacio Enecilla, 65, nilalapatan ng lunas sa Las Piñas Doctors Hospital.
( JAJA GARCIA )
