HATAW! D'yaryo ng Bayan hatawtabloid.com
WALONG kalalakihan ng hinihinalang sangkot sa droga, kabilang ang isang barangay kagawad, ang patay makaraan pagbabarilin ng pinaniniwalaang mga miyembro ng vigilante group sa magkakahiwalay na insidente sa Caloocan City.
Dakong 12:00 am kahapon nang pagbabarilin ng dalawang hindi nakilalang lalaki sina Kenneth Satairapan, 22, at Noel Calimbas, 59, sa Saint Cecilia St., Maligaya Parkland, Brgy. 177.
Dakong 10:50 pm nitong Miyerkoles, natagpuang walang buhay sina Barangay Kagawad Martin Parallag, 53, at Leandro Avila sa harap ng Caloocan Gas Corporation sa Diamante St., Brgy. 166 Kaybiga.
Nakatayo sa waiting shed sa kanto ng Sampaguita St. at Quirino Hi-way, Brgy. 185 si Delfin Lodor, 36, dakong 10:30 pm kamakalawa nang pagbabarilin ng dalawang hindi nakilalang lalaki.
Habang naglalaro ng online game sa loob ng Igy at Kyles Computer Shop sa Alpe Compound, Brgy. 165, dakong 9:19 pm si Gerald Gutierrez, 28, nang pagbabarilin ng lalaking nakasuot ng bull cap at face mask.
Namatay si Raymundo Alabantak, 45,makaraan putukan sa ulo ng riding-in-tandem suspects sa ABC Main Road, Kingstown 1.
Dakong 6:45 pm, naglalakad sa Little Baguio, Miramonte Heights, Brgy. 180 si Jacob Garcia, 47, dating Barangay Executive Officer (Ex-O), nang pagbabarilin ng riding-in-tandem suspects.
( ROMMEL SALES )
