Kongresista guilty sa shortselling & adulteration (Branded LPG tanks ni-refill)

HINATULANG guilty ng Malabon City court si Liquefied Petroleum Gas Marketers’ Association (LPGMA) party-list Rep. Arnel Ty.

Sa 16-pahinang desisyon na inilabas ng Department of Justice, nakakita ang Malabon Regional Trial Court nang sapat na ebidensya laban kay Ty hinggil sa “shortselling and adulteration” ng produktong petrolyo.

Ayon sa korte, hindi authorized ang kompanya ni Ty na Republic Gas Corp (Regasco) sa pag-refill ng LPG tanks ng mga higanteng kompanya kagaya ng Pilipinas Shell Petroleum, Petron at Total Gas.

Dahil dito, nilabag ni Ty ang Section 2 (a) kaugnay sa Section 3 at Section 4 ng Batas Pambansa Bilang 33 o “An Act Defining and Certain Prohibited Acts Inimical to the Public Interests and National Security Involving Petroleum and/or Petroleum Products.”

Bunsod nito, pinagmumulta si Ty ng P50,000 kaakibat ang subsidiary imprisonment kung bigo siyang makabayad ng naturang halaga.

Bukod dito, ipinakakansela ang “license to operate” ng Regasco, maging ang pagkompiska sa mga produktong petrolyo na nakuha mula sa warehouse nito.

Hindi tinanggap ng korte ang paliwanag ni Ty na ang mga walang laman na branded LPG tanks na nakuha mula sa warehouse nito ay bahagi ng kanilang marketing strategy.

“It is highly doubtful that the volume of the confiscated filled branded LPG cylinders constitutes the number of converted clients… No consumer in his right mind would trade off a newly-purchased or filled LPG gas cylinder for another brand which is being offered for a lesser price,” nakasaad sa desisyon.