HUMANTONG sa trahedya ang masaya sanang pa-boxing sa kalye sa isang barangay sa San Miguel, Maynila nang mamatay ang isang manlalaro makaraan masuntok at tumama ang ulo sa semento nitong Sabado.
Ayon sa ulat, nakuhaan ng video ang paglalaban ng dalawang lalaki sa palarong boxing sa Brgy. 646 sa San Miguel.
Bagaman kapwa sila naka-boxing gloves, wala silang suot na proteksiyon sa ulo.
Hindi nagtagal, tinamaan ng suntok sa panga ang biktimang si Rudio Legaspi, 28-anyos, at natumba.
Pinagkaguluhan siya ng mga tao nang hindi agad nakatayo.
Ayon sa mga saksi, nagkamalay pa si Legaspi at nagsabing gustong matulog at saka sumuka kaya dinala siya sa ospital ngunit binawian ng buhay.
“Nasapol siya dito (itinuturo ang panga), pagtama diretso bumagsak, tumama ‘yung ulo,” ayon kay Julius Gumban, amo ng biktima.
Sinasabing nagkaroon ng pagdurugo sa utak ni Legaspi kaya namatay.
Ayon sa amo ng biktima, mga residente lang ang nag-organisa ng palaro.