PATAY ang dalawang hindi nakilalang lalaking hinihinalang mga karnaper makaraan makipagpalitan ng putok sa mga operatiba ng Quezon City Police District (QCPD) sa isang checkpoint kahapon ng madaling araw sa nasabing lungsod.
Sa ulat kay QCPD director, Sr. Supt. Guillermo Lorenzo T. Eleazar, patuloy pang inaalam ng mga tauhan sa Anti-Carnapping at District Special Operation Unit (DSOU) na nagsagawa ng operasyon, ang pagkakilanlan ng dalawang napatay na mga suspek.
Sa imbestigasyon, dakong 1:30 am, pinatatabi ng mga awtoridad ang mga suspek na lulan ng isang motorsiklo sa checkpoint sa kanto ng Congressional Road at Tandang Sora Avenue, Brgy. Tandang Sora, Quezon City.
Ngunit pinaharurot ng mga suspek ang kanilang motorsiklo kaya hinabol ng mga pulis at nagkaputukan na nagresulta sa pagkamatay ng dalawa.
( ALMAR DANGUILAN )
