Di kagalingang actor, pahinga muna dahil may attitude

MUKHANG pahinga muna ang drama ng management sa aktor na hindi naman kagalingang umarte pero may attitude na.

Naikuwento sa amin ng taga-production ng network na hindi muna nila bibigyan ng project ang aktor dahil problemado ito sa asawa niyang taga-showbiz din.

Insecure raw ang aktor ngayon dahil mas maraming project ang asawa niya bagay na dapat daw sanang ipagpasalamat.

“Ayaw ba niya (aktor) niyon, malaki ang tulong ng asawa niya kasi may mga project kaysa kanya (aktor) na isa lang? Hindi naman makabubuhay ang kinikita niya para sa kanilang mag-asawa? Mas malaki ang bayad sa asawa (aktres) niya dahil mas may name,” kuwento sa amin ng taga-production.

Naapektuhan daw kasi ang aktres nang mag-away silang mag-asawa na naging dahilan kaya na-pack-up ang shooting.

“Hindi kasi matanggap din ni (aktor) na mas sikat sa kanya ang asawa (aktres) niya at hindi siya ang kapartner,” sabi pa sa amin.

As of now ay walang project ang aktor kaya taumbahay muna siya.

( Reggee Bonoan )