HATAW! D'yaryo ng Bayan hatawtabloid.com
PATAY ang isang babaeng dentista nang pagbabarilin ng dalawang holdaper na magkaangkas sa motorsiklo, sa loob ng kanyang dental clinic sa Makati City kahapon ng hapon.
Kinilala ni SPO3 Noel Pardinas, imbestigador ng Homicide Section, ang biktimang si Dra. Raquel Magellan, 38, residente sa Taguig City.
Base sa inisyal na ulat ni SPO2 Rico Caramat, pasado 2:00 pm kahapon nang mangyari ang pagholdap sa klinika ng biktima sa 9547 Kalayaan Avenue, Brgy. Guadalupe Nuevo.
Dumating sa klinika ang dalawang suspek na sakay ng isang motorsiklong hindi naplakahan at nagdeklara ng holdap bago pinaputukan nang ilang beses ang dentista.
Iginapos ng mga holdaper ang kamay ng babaeng assistant ng biktima na hindi pinangalanan.
Agad tumakas ang mga suspek patungong C5 makaraang isagawa ang krimen.
Inaalam ng mga awtoridad kung may natangay ang mga suspek gayondin ang pagkakilanlan ng mga salarin.
( JAJA GARCIA )
