This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
HINDI maaaring umalis ng bansa ang mga tauhan ng poll technology provider na Smartmatic, ayon kay Commission on Elections Commissioner Rowena Guanzon.
Sinabi ni Guanzon, gagawa siya ngayong araw ng memo sa Comelec en banc at sa binuong investigation committe na sulatan ang Smartmatic president na dapat walang aalis sa kanila habang sila ay iniimbestigahan.
Ito ay kaugnay sa nangyaring pagpapalit sa script ng hash code ng transparency server noong gabi ng Mayo 9 na naging ugat para kuwestyonin ni vice-presidential candidate Sen. Ferdinand “Bongbong” Marcos ang integridad ng halalan at bilangan ng boto.
Ayon kay Guanzon, hindi dapat paalisin ng Smartmatic ang kanilang mga tauhan hangga’t hindi pa tapos ang ginagawang imbestigasyon.
“Flight is an indication of guilt. Ang pagtakas ay pag-amin ng (kasalanan). Kung may pananagutan sila, managot sila,” ani Guanzon.
Samantala, kanya rin aniya munang aalamin kung kailan magsisimula ang imbestigasyon laban sa Smartmatic pati na rin sa iba pang taong sangkot sa kontrobersiya.
Iginiit din niya na hindi na dapat pinakialaman pa ni Smartmatic Project Manager Marlon Garcia ang lumalabas na “?” sa pangalan ng mga kandidato na may letrang “ñ.”
Ito ay sapagkat tapos na rin aniya ang botohan at hindi na rin kailangan pang ‘pagandahin ang pangalan’ ng mga kandidato.
Nakaboto na rin aniya ang mga tao at pumapasok na rin ang transmission ng mga boto noong gabing iyon kaya hindi na sana ginalaw pa ang nasabing script ng hash code.
