This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
PATAY ang isang Singaporean national makaraan tumalon mula sa ikalimang palapag at bumagsak sa lobby ng tinutuluyan niyang condominium sa Pasay City kahapon ng umaga.
Binawian ng buhay habang ginagamot sa San Juan De Dios Hospital ang biktimang si Kee Kian Eng, 48, ng Unit 5L, 5th floor, Montecito Residential Resort Condo, Resort Drive, New Port City, Villamor ng naturang siyudad.
Sa ulat sa tanggapan ni Pasay city police chief, S/Supt. Joel B. Doria, naka-duty sa lobby ang guwardyang si Jay Mayor nang nakarinig siya nang malakas na kalabog sa bahagi ng hardin ng naturang condominium sa unang palapag dakong 5:20 a.m.
Dali-dali niyang pinuntahan ang lugar upang alamin ang pinagmulan nang malakas na kalabog at tumambad sa kanya ang duguan at nangingisay na Singaporean .
Agad siyang humingi ng tulong sa kanyang mga kasamahan at isinugod sa ospital ang biktima.
Ngunit habang nilalapatan ng lunas ay binawian ng buhay ang biktima dakong 7:30 a.m.
Patuloy pang iniimbestigahan ng pulisya ang insidente upang mabatid kung may kaugnayan sa negosyo o personal na problema ang pagpapakamatay ng dayuhan.
