This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
PINATUTUKAN ng Palasyo sa Department of Health (DOH) ang posibleng pagpasok sa bansa ng Zika virus na nakakaapekto sa Latin America.
Ito’y dahil nababahala na ang World Health Organization (WHO) sa pinakabagong impormasyon na posibleng maisalin nang tao-sa-tao ang Zika virus sa pakikipag-sex o pakikipagtalik.
“Masinsing tinututukan ng Department of Health ang Zika virus alinsunod sa mga tagubilin ng WHO upang tiyakin ang kaligtasan ng mga mamamayan,” ayon kay Communications Secretary Herminio Coloma Jr.
Ang Zika virus ay isang uri ng mosquito-borne virus na nagiging dahilan ng pagliit ng ulo at utak ng isang sanggol o microcephaly sa Latin America.
Napaulat kamakalawa na naitala sa Dallas, Texas, USA ang kaso ng Zika virus transmission na pinaniniwalaang nahawa sa pakikipagtalik at hindi nagmula sa kagat ng lamok.
Magugunitang ideneklara ng WHO na global health emergency ang Zika virus para maisagawa ang mas malawak na pagmo-monitor at pag-aaral sa pagkalat nito sa ibang panig ng mundo.
Pinoys sa US inalerto ng Ph Embassy vs Zika Virus
NAGBABALA ang Philippine Embassy sa Washington sa mga Filipino sa Estados Unidos na maging maingat sa posibleng paglaganap ng Zika virus.
Ayon sa abiso ng embahada, kailangang maging maalam ang Filipino-American community tungkol sa peligrong hatid ng Zika.
Kabilang dito ang pag-aaral sa sanhi, sintomas, paraan kung papaano makahahawa ang isang taong infected, preventive measures at maging ang nakompirmang mga kaso tungkol sa virus.
