PATAY ang isang pasyenteng may prostate cancer sa East Avenue Medical Center sa Quezon City makaraang tumalon mula sa ikalimang palapag ng ospital kahapon.
Sa ulat ng Quezon City Police District (QCPD) Kamuning Police Station 10, kinilala ang biktimang si Joselito Amor, 48, family driver, residente ng 18 Katangian St., Batasan hills sa lungsod, idineklarang namatay dakong 3 p.m. habang nilalapatan ng lunas makaraang tumalon dakong 12:55 p.m.
Ayon kay PO2 Rexaldo Salvador, nagpatingin si Amor sa ospital (out patient) kaya nalaman niyang mayroon siyang prostate cancer.
Ngunit nang lumabas ang resulta ng pagsusuri ay nabatid niyang malala na ang kanyang sakit at ipinayo sa kanya ng doktor na sumailalim siya sa isang linggong regular medication.
Ayon sa kanyang misis, nang mabatid ng kanyang mister ang resulta ng medical examination ay naging balisa na ang biktima.
Habang naglalakad sila sa unang palapag para bumili ng gamot sa botika ng ospital, binilisan ng biktima ang paglalakad kaya naiwan ang kanyang misis.
Pagkaraan ay tumakbo paakyat ang biktima, nagbabay sa kanyang misis at nang makarating sa ikalimang palapag ng ospital ay tumalon.
Agad sumaklolo ang ilang tauhan ng ospital at dinala sa emergency room ang biktima ngunit hindi na naisalba ng mga doktor.
