2 patay, 7 kritikal, 13 sugatan sa truck vs bus sa Cavite

DALAWA katao ang patay habang 20 ang sugatan makaraang salpukin ng isang trailer truck ang pampasaherong bus sa Aguinaldo Highway malapit sa Brgy. Lalaan, Silang, Cavite nitong Sabado ng gabi.

Base sa inisyal na imbestigasyon, ang truck na galing sa Tagaytay, ay biglang tinahak ang opposite lane na nagresulta sa pagsalpok sa bus na patungong Tagaytay.

Agad binawian ng buhay ang driver at isang pasahero ng bus sa insidente.

Habang sugatan ang 20 iba pa kabilang ang pitong kritikal ang kondisyon.

Agad isinugod ang mga biktima sa iba’t ibang pagamutan.

[divider]

3 sugatan

MOTORSIKLO SUMALPOK SA POSTE, 1 PATAY

BAGUIO CITY – Patay ang isang 19-anyos binatilyo makaraang sumalpok ang sinasakyan na motorsiklo sa poste ng koryente sa sitio Cotcot, Bangao, Buguias, Benguet habang sugatan ang tatlo niyang backriders.

Kinilala ni Supt. Cherry Fajardo, public information officer ng Police Regional Office Cordillera, ang namatay na si Jomel Morel Palada, habang ang mga sugatan ay sina Charlie Agustin Paran, 23; Judy Ann Maggay Libagen, 18; at Rosalie Gasmena Fudayan, 18, pawang mga residente sa naturang lugar.

Batay sa inisyal na imbestigasyon ng pulisya, makaraang mag-inoman ang mga biktima ay sumakay sila sa isang motorsiklo para umuwi.

Gayonman, habang nasa kalsada ay biglang nawalan ng kontrol ang driver sa manibela ng motorsiklo dahilan para bumangga ito sa poste ng koryente sa gilid ng kalsada.

Dahil sa lakas ng kanilang pagkakabangga ay tumilapon ang mga biktima at bumagsak sa semento.

Agad isinugod sa Lutheran District Hospital ang mga biktima ngunit ideklarang dead on arrival si Palada.