MALINAW ang mensahe ni Pangulong Benigno “Noynoy” Aquino para sa nalalapit na eleksyon: “Hindi ko iiwan si Mar.”
Ito ang pahayag ni PNoy sa kanyang talumpati kahapon sa tinawag na “Gathering of Friends” na ginanap sa Cebu kamakailan.
Tila reaksyon ito ni PNoy sa ibang kampong umaasa pa sa suporta nito pagdating ng halalan. Binalikan ni PNoy at ng kanyang gabinete ang mga naging bunga ng ‘Daang Matuwid’ sa Cebu at ang naging suporta ng mga Cebuano sa administrasyon.
“Kayo nga pong mga Cebuano ang kumupkop sa aking ina noong simula ng EDSA. Talaga naman pong panatag ang loob ko noon,” pagbabalik-tanaw ni PNoy.
Hinimok ni PNoy na suportahan ng mga Cebuano si Mar Roxas na pambato ng kanyang administrasyon dahil “kailangan nating ipagpatuloy ang pagbubuklod tungo sa malawakang kaunlaran.”
Nakikitang malaki ang maagiging epekto ng suporta ni PNoy kay Roxas lalo’t mukhang lalabas ito para mangampanya.
Ayon sa mga political analyst, malaking bagay ang suporta ng isang Pangulong mataas pa rin ang rating sa mga survey para sa isang kakandidato. Napatunayan na ito noong 2013 kung saan nakuha ng Team PNOY ang marami sa mga posisyon sa Senado.
“We are fighting the good fight,” sabi ni Roxas. “The future is not something that just happens. Ang magandang kinabukasan hindi basta-bastang dumarating na lang,” diin ni Roxas.
