This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
HINDI nakabatay sa batas ang pagpayag ng Korte Suprema na makapagpiyansa si Sen. Juan Ponce-Enrile sa kasong plunder.
Ito ang inihayag kahapon ni Pangulong Benigno Aquino III sa Cebu City.
Hindi aniya ikinonsidera ng Supreme Court ang mga ebidensiyang inihain laban kay Enrile na nagsasangkot sa senador sa pork barrel scam.
“Importante yatang kilalanin na ‘yung sa desisyon ng Korte Suprema, wala silang binabanggit tungkol sa ebidensiya. Tila nakasentro sa edad at sa kalagayan ng kalusugan ni Senator Enrile. Parang wala naman sa mga batas natin ‘yung mga grounds na ‘yun,” anang Pangulo.
Ngunit sa kabila nito’y wala aniyang magiging epekto ito sa kampanya ng kanyang administrasyon laban sa korupsiyon.
“Tuloy-tuloy ang kampanya natin,” aniya.
Nauna nang napa-ulat na inutusan ng Pangulo ang kanyang legal team na repasohin ang pasya ng SC para maka-pagpiyansa si Enrile.
