ILOILO CITY – Nakakulong sa La Paz Police Station sa lungsod ng Iloilo ang isang Vietnamese national na tagaluto sa barko makaraan saksakin at itulak sa hagdan ang dalawa niyang kasamahan sa barko.
Nangyari ang insidente kahapon ng madaling-araw habang nakadaong sa Iloilo International Port ang cargo vessel na MV Quang Minh.
Sa imbestigasyon ng mga pulis, kinutya at dinuraan ng mga biktima ang nilutong pagkain ng suspek na si Nnuyen Khacvu ng Hot Ken, Vietnam.
Dahil dito, nagalit ang suspek at sinaksak sa dibdib ang isa sa mga nanlait sa kanyang niluto na kapwa niya Vietnamese national, na kinilalang si Gian Van Moui, 33, habang itinulak sa hagdan ang isa pang kasamahan na si Dohuu Duc, 23.
Ang dalawa ay kapwa naka-confine sa ospital sa lungsod ng Iloilo habang sumuko sa kanilang kapitan na si Hoang Tro Thai, 40, ang suspek na dinala na sa Lapaz PNP.
Napag-alaman, pabalik na sana ang barko sa Vietnam makaraan maihatid ang mga dalang kargamento sa Iloilo ngunit maaaring maiwan sa lungsod ang suspek kung sasampahan siya ng kaso.
