HATAW! D'yaryo ng Bayan hatawtabloid.com
RIZAL – Arestado ang dalawang karnaper na tumangay sa isang Toyota Innova sa Angeles City makaraan makita sa Global Positioning System (GPS) na patungo sila sa Lungsod ng Antipolo.
Kinilala ni Rizal PNP Director Bernabe Balba, ang mga nasakote na sina Rambo Tamayo, 27, call center agent, ng Brgy. Inarawan, Antipolo City; at Cecilia Guttierez, 32, saleslady ng Tondo, Manila.
Sa ulat, dakong 4 a.m. nang tangayin ng mga suspek ang nasabing sasakyan sa Brgy. Sapang Maisac, Angeles City, Pampanga.
Ayon sa may-ari ng sasakyan na si Herminia Panlilio, residente ng Brgy. Sapang Maisac, Angeles City, Pampanga, nagulat na lamang siya nang makitang wala na sa pinagparadahan ang Innova.
Lingid sa kaalaman ng mga suspek ay may nakakabit na GPS sa nasabing sasakyan.
Agad ipinagbigay-alam sa pulisya ang insidente at sa pamamagitan ng GPS ay nakita ang nasabing sasakyan sa Marcos Highway patungo sa nasabing lungsod.
Ang mga suspek na nakakulong na sa detention cell ng Antipolo PNP ay nakatakdang sampahan ng kasong carnapping sa piskalya.
Mikko Baylon
