ATIMONAN, Quezon – Hindi pa rin natatagpuan ang 10-anyos batang lalaki na pinaniniwalang nalunod sa ilog sa kasagsagan ng bagyo sa Brgy. Caridad ng bayang ito kamakalawa.
Sa ipinadalang report ng Atimonan PNP sa Camp Guillermo Nakar sa Lucena City, sa tanggapan ni Senior Supt. Ronaldo Genaro Ylagan, Quezon PNP Provincial Director, kinilala ang biktimang si Aries Espilenburgo Mercadejas, residente sa naturang lugar.
Sa imbestigasyon ng pulisya, dakong 12:30 p.m. kamakalawa, nagtungo ang biktima sa tabing ilog malapit sa Lavidez Bridge upang mamulot ng naanod na niyog.
Ngunit minalas na madulas kaya nahulog sa ilog at tinangay ng malakas na agos.
Patuloy na pinaghahanap ng rescue team ang biktima.
Raffy Sarnate
