HATAW! D'yaryo ng Bayan hatawtabloid.com
ARESTADO sa entrapment operation ng National Bureau of Investigation (NBI) ang isang piskal na sinasabing nangikil ng pera sa isang abogado na may hawak ng kasong nakabinbin sa kanyang tanggapan.
Kinilala ang suspek na si Assistant City Prosecutor Raul Desembrana ng Quezon City Prosecutors Office.
Pasado 11 a.m. kahapon sa loob ng isang restaurant sa Quezon Memorial Circle nang madakip ng NBI si Desembrana makaraan abutin ang P80,000 cash mula sa isang abogado na may kliyenteng nahaharap sa kasong unjust vexation.
Ayon kay Prosecutor General Claro Arellano, kasong direct bribery o paglabag sa Article 210 ng Revised Penal Code at paglabag sa Anti-Graft and Corrupt Practices Act ang kahaharapin ni Desembrana.
Ang suspek ay nakakulong na sa punong-tanggapan ng NBI makaraan maisalang sa inquest proceedings.
Sa kanyang panig, sinabi ni Justice Secretary Leila de Lima, bagama’t isang kahihiyan sa kanilang institusyon ang pagkakadakip kay Desembrana, hindi siya magdadalawang-isip na iutos ang regular na entrapment operation para mapanagot ang mga tiwali sa kanilang hanay.
Leonard Basilio
