[divider]
NAKATUTUWA ang fans ng NLex—Nash Aguas at Alexa Ilacad dahil mas alam pa nila kung kailan ang airing ng Bagito na pagbibidahan ng batang aktor.
Ang Bagito raw ang papalit sa Hawak Kamay ni Piolo Pascual na parang ang dinig namin ay ang Dream Dad naman ni Zanjoe Marudo.
Ang alam kasi namin ay sa susunod na taon pa ipalalabas ang Bagito dahil binubuo palang ito ng Dreamscape Entertainment. At tanda namin sabi ng business unit head na si Deo T. Endrinal, gusto nilang magbakasyon ngayong Disyembre.
Ang sigurado kaming eere ngayong Disyembre ay ang Christmas seryeng Give Love On Christmas na ang mga bida ay sina Eddie Garcia, Carlo Aquino at iba pa na may episode title na Gift Giver; sina Gerald Anderson at Maja Salvador naman para sa Gift of Life at sina Paulo Avelino at KC Concepcion naman sa Exchange Gift.
Binanggit namin sa fans ng NLex na sa 2015 pa ang Bagito, pero ipinagmamatigasan nilang ngayong Nobyembre ang airing, okay fine!
ni Reggee Bonoan
