Pagtatapos ng Ikaw Lamang, makapigil-hininga

 

PIGIL ang hininga ng mga nakapanood sa pagtatapos ng Ikaw Lamang Full Circle episode noong Biyernes dahil inaabangan kung paano magagapi ni Gabriel (Coco Martin) ang taong sumira ng buhay ng pamilya niya na si Franco (Christopher de Leon).

Bilib kami sa propesyonalismo ni Boyet dahil pumayag siyang isabit sa bakal na ikinamatay niya dahil tumusok ito sa katawan niya na karamihang gumagawa lang nito ay mga supporting actor.

At hindi naman nabigo ang cast sa mga hirap nila dahil nagtala ng 34.1%, o 21 puntos ang lamang sa katapat nitong programa sa GMA na Hiram na Alaala na nagtala ng 13.1%.

Nanguna rin ang Ikaw Lamang sa social networking sites tulad ng Twitter na naging no.1 worldwide trending topic ang official hashtag nito na #ILFullCircle dahil sa buhos ng mga positibong tweets ng netizens.

Tulad ng pangako nina Coco at Kim Chiu sa mga sumusubaybay ng Ikaw Lamang, bibigyan nila ng happy ending dahil halos lahat sila ay buhay maliban kay Samuel na ginagampanan ni Joel Torre.

Ang Ikaw Lamang ay idinirehe nina Malu Sevilla, Manny Palo, at Avel Sunpongco, mula naman sa Dreamscape Entertainment Television, ang grupong lumikha ng mga de-kalibre at top-rating TV masterpiece gaya ng Walang Hanggan, Ina Kapatid Anak, at Juan dela Cruz.

 

ni Reggee Bonoan