Kaya kayang lampasan nina Kathryn at Khalil ang ratings ng Jadine sa Wansapanataym?

KAYA kayang tapatan ng susunod na episode ng Wansapanataym ang My App Boyfie nina James Reid, Nadine Ilustre, at Dominique Roque dahil simula nang mapanood ito ay parating trending at mas lalo pang tumaas sa ratings game ngayong finale week na.

Sa huling dalawang episode ngayong weekend (Oktubre 25 at 26) ng My App Boyfie mawawalay na si Anika (Nadine) sa nilikha niyang “app boyfriend” dahil sa pagkuha ng kanyang tiyahin na si Stella (Cherie Gil) sa computer tablet na nagkokontrol dito matapos matuklasan ng lahat ang tungkol sa tunay na pagkatao ni Joe (James).

Ano ang gagawin ni Anika sa oras makalimutan siya ni Joe dahil sa pakikialam ni Stella sa application na lumikha rito? Maibabalik pa ba niya ang alaala ng kaisa-isang lalaki na nagparamdam sa kanya ng pagmamahal o tuluyan na ba itong mabubura sa buhay niya?

Tampok din sa Wansapanataym Presents My App Boyfie sina Malou Crisologo, Ingrid dela Paz, Jazz McDonald, Marco Pingol, at Elise Joson. Bahagi rin ng programa bilang guest stars sina Isabel Oli at Alex Castro mula sa panulat ni Noreen Capili at direksiyon ni Jojo Saguin.

Ang susunod na episode sa Wanasapanataym ay reunion nina Kathryn Bernardo at Khalil Ramos na nagsama sa Princess and I.  Iisa ang tanong ng lahat, bakit wala si Daniel Padilla?

Reggee Bonoan