CEBU CITY – NAMATAY sa sunog ang isang 101-anyos lola nang tupukin ng apoy ang kanyang bahay sa Barangay Kasambagan, sa lungsod na ito.
Sa ulat ni Cebu City Fire Marshall Rogelio Bongabong, kinilala ang biktimang si Juanita Canete Arcaya, ng St. Michael Village, Barangay Kasambagan.
Tumagal ang sunog ng may 20 minuto na sinabing nagsimula sa kuwarto ng biktima kaya hindi na siya nakalabas.
Ayon sa anak ng biktima na si Leonora Palompon, pinagsikapan nilang iligtas ang ina pero malaki na ang apoy kaya hindi na sila makapasok.
Inaalam ng mga awtoridad kung ano ang pinagmulan ng apoy na tumupok sa ari-arian.
Inianunsyo ni Cebu City Mayor Michael Rama, na pagkakalooban ng P100,000 cash ng Cebu City government bilang bahagi ng Centenarians Financial Assistance na tatanggapin ng kanyang mga naulilang pamilya.
(Beth Julian)
