HATAW! D'yaryo ng Bayan hatawtabloid.com
TATLO ang patay habang nasa kritikal na kalagayan ang tatlo pang mga kasamahan makaraan paulanan ng bala ng hindi nakilalang apat lalaking lulan ng dalawang motorsiklo habang nag-iinoman kamakalawa ng gabi sa Caloocan City.
Agad binawian ng buhay sa insidente ang biktimang si Rey Cayetano, 35, barbero at residente ng Phase 8, Package 6, Brgy. 176, Bagong Silang ng nasabing lungsod.
Habang hindi naisalba ang buhay ni Aiko Escarda, 23, ng mga doktor ng Dr. Jose N. Rodriguez Memorial Hospital, at hindi umabot nang buhay sa Nodado Hospital si Jomar Andaya, nasa hustong gulang, kapwa residente ng Package 89, Lot 31 ng nasabing barangay.
Inoobserbahan sa pagamutan sina Ogie Laderas, Bobby Sarmiento, at Jerome Tenson, pawang 23-anyos, at residente rin ng nasabing lugar.
Batay sa ulat ni PO2 Mark Andrew Bartolome, dakong 8:30 p.m. nang maganap ang insidente sa Phase 4B, Package 8, Block 89 ng nasabing barangay.
Masayang nag-iinoman ang mga biktima nang sumulpot ang apat na mga suspek sakay ng dalawang motorsiklo at walang habas na pinagbabaril ang mga biktima.
(ROMMEL SALES)
