PINAG-IINGAT ng Makati City Police ang mga residente sa lungsod sa bagong modus operandi ng nagpapanggap na mga ahente ng Liquified Petroleum Gas (LPG) tanks
Base sa ulat ng pulisya, nagpupunbta sa mga bahay-bahay ang mga pekeng nagpapakilalang ahente ng gasul .
Sinasabi ng mga suspek na iinspeksiyonin nila ang tangke kung may leak upang makapasok sa bahay ng bibiktimahin.
Pagkaraan ay sasabihin na may leak ang tangke para mailabas at kapag nalingat ang may-ari ay agad isasakay sa motorsiklo at tatakas ang mga salarin.
Nagbabala rin ang Makati police sa modus operandi ng ilang grupo na naghihingi ng tulong pinansiyal para sa sinasabing local basketball tournament ngunit ang pakay ay magnakaw.
May dalang solicitation letter ang mga suspek at hihingi ng pera sa bahay-bahay para sa liga ng basketball at kakausapin at lilibangin ang kausap habang ang isang kasama ay papasukin ang bahay para magnakaw. (JAJA GARCIA)
