KALABOSO ang dalawang lalaki na responsable sa pagpatay sa mag-asawang negosyante sa ilalim ng tulay sa North Luzon Expressway (NLEX), Pulilan, Bulacan.
Kinilala ang mga suspek na sina Renato Mendoza, 43, ng Brgy. Sta. Cruz, Sta. Maria at Romnick de Guzman, 25, ng Brgy. San Juan, Balagtas, Bulacan kapwa duck racers.
Ayon kay Bulacan Police director S/Supt. Ferdinand Divina, inaresto ang dalawang suspek sa pagpatay sa mag-asawang Marlon Balajadia at Anna Sarcia, kapwa residente ng Brgy. Dulong Malabon, sa Pulilan.
Nabatid na ang dalawang suspek ay kapitbahay ng mga biktima na matagal nang may alitan sa negosyo.
Dinakip sina Mendoza at De Guzman matapos ituro ng mga residente na may nakita silang dugo sa mga paa at damit ng dalawang suspek ilang oras nang maganap ang pagpatay sa mag-asawa.
Nang suriin sa Bulacan Provincial Crime Laboratory ang mga ebidensiya laban sa dalawang suspek, nagpositibo sila kaya kaagad sinampahan ng kasong double murder sa Office of the Bulacan Provincial Prosecutor’s Office.
(MICKA BAUTISTA)
