9 pulis-QCPD suspek sa ‘tutukan’ ng baril sa EDSA

SIYAM na pulis ang suspek sa insidente ng tutukan ng baril sa EDSA na magugunitang nakunan ng litrato at kumalat sa social media.

Sa press conference kahapon, inamin mismo ng Philippine National Police (PNP) na mga miyembro nila ang sangkot sa krimen, walo rito ang aktibo sa La Loma Police Station 1 habang isa ang matagal nang dismissed.

Kinilala ang mga suspek na sina PSI Marco Polo Estrera (dismissed), Chief Inspector Joseph De Vera, PSI Oliver Villanueva, SPO1 Ramil Hachero, PO2 Jonathan Rodriguez, PO2 Weavin Masa, PO2 Mark De Paz, PO2 Jerome Datinguinoo at PO2 Ebonn Decatoria.

Ayon kay Eastern Police District (EPD) director, Chief Supt. Abelardo Villacorta, una nilang na-trace si De Vera makaraan mabatid na pagmamay-ari niya ang sangkot na Toyota Hi-Ace (YF 9767).

Kasama ang dalawang biktima, pinuntahan ng mga awtoridad si De Vera sa kanyang estasyon.

Ayon sa mga biktima, dinala rin sila sa La Loma Police Station 1 makaraan dukutin sa EDSA. Pitong oras sila sa estasyon bago pinalaya.

Umamin si De Vera sa insidente at ikinanta ang mga kasamahan.

Binanggit din ng mga biktima na P2 milyon ang natangay sa kanila, bukod sa P60,000 na ipina-withdraw sa kanila ngunit itinanggi ito ni De Vera sa pagsasabing P300,000 lang ang kinuha nila.

Bukod kay De Vera, naaresto rin ang isa pang suspek na si Rodriguez. Patuloy na tinutugis ang pito pang mga suspek.

Kung may impormasyon sa mga suspek, maaaring magsumbong sa awtoridad sa numerong 641-0877 o 0906-545-7238.

Samantala, sinabi ni Quezon City Police District (QCPD) Chief Superintendent Richard Albano, sinibak na si Supt. Osmundo de Guzman, ang hepe ng La Loma Station.