HATAW! D'yaryo ng Bayan hatawtabloid.com
BINURDAHAN ng saksak hanggang mapatay ng nakababatang kapatid ang 45-anyos na lalaki dahil sa hindi pagpayag na mag-inoman sa kanilang bahay sa Tondo, Maynila, kahapon.
Walang habas na pananaksak ang sanhi ng kamatayan ng biktimang si Alberto Balachica, 45, ng 2447 Bonifacio St., Vitas, Tondo.
Agad tumakas ang suspek na nakababatang kapatid ng biktima na si Jesus, 32, isang matansero, ng 2227 Interior Vitas, Tondo.
Sa imbestigasyon ni SPO2 Jonathan Bautista, ng Manila Police District- Homicide Section (MPD-HS), bandang 7:15 a.m., nang maganap ang krimen sa bahay ng biktima.
Dumating ang suspek sa bahay ni Alberto kasama ang kaibigan buhat sa slaughter house, para mag-inoman pero mariing tumutol ang biktima.
Dahil napahiya sa kaibigan, nagalit ang suspek kaya nagkaroon sila ng manitang pagtalo, kumuha ng butcher’s knife saka pinagsasaksak ang kuya hanggang mapatay. (LEONNARD BASILIO)
