HATAW! D'yaryo ng Bayan hatawtabloid.com
KRITIKAL ang kalagayan ng isang lalaki habang sugatan ang kanyang kasamahan nang madikit sa high tension wire sa gusali ng Maynilad Water Services, Inc. (MWSI) habang nagsusukat ng bintana sa Caloocan City kamakalawa ng hapon.
Inoobserbahan sa Intensive Care Unit (ICU) ng Manila Central University (MCU) Hospital sanhi ng pagkasunog ng katawan ng biktimang si Emmanuel Perez, 32, sub-contractor ng MWSI, at residente sa 4227 Young St., Gen. T. de Leon, Valenzuela City.
Agad nakalabas ng pagamutan ang helper niyang si Dante Tiburana, 42, dumanas ng minor injuries.
Batay sa imbestigasyon ni PO3 Jimmy Armas, naganap ang insidente dakong 1:30 p.m. sa ikaapat na palapag ng MWSI sa EDSA, Biglang Awa St., Caloocan City.
Dahil sa lakas ng koryente, tumilapon ang biktima at tumama sa waiting shed bago bumagsak sa kalsada.
Nakoryente rin si Tiburana pero ’t bahagya lamang.
(ROMMEL SALES)
