Parak timbog sa putok (Dahil sa selos)

KALABOSO ang isang bagitong pulis nang ireklamo sa pagpapaputok ng baril sa kalagitnaan ng pag-aaway nila ng kinakasama sa Sta. Mesa, Maynila, kamakalawa.

Si PO1 Jupiter Balea, 34, nakatalaga sa Camp Crame, ng 614 Makisig St., Bacood, Sta. Mesa, Maynila, ay inaresto ng nagrespondeng si SPO3 Edgar Mancal, ng MPD-SWAT.

Ayon kay SPO1 James Poso, ng Manila Police District- General Assignment and Investigation Section (MPD-GAIS), dakong 6:45 p.m. nang maganap ang insidente sa bahay ng suspek at kinakasamang si Tricia Ryce, 25.

“Nag-aaway ang dalawa sa loob ng bahay nang makarinig kami ng dalawang putok ng baril kaya inireport namin sa barangay dahil natakot kami na baka may tamaan,” pahayag ng kapitbahay na sina Elizabeth Relegarse at Elyssa Silos. Agad tumawag ng pulis si Barangay Kagawad Noli Legarce, ng Barangay 618, Zone 61, kaya naaresto ang suspek.

Sa presinto, inamin ni Ryce na selos ang dahilan ng kanilang pag-aaway ng kinakasamang pulis.

Inihahanda na ang kasong indiscriminate firing at alarm scandal na isasampa laban sa suspek habang nasa kustodiya ng Punta Police Community Prescint (PCP).

(LEONARD BASILIO)