HATAW! D'yaryo ng Bayan hatawtabloid.com
NATURAL na blonde ang NCIS star na si Pauley Perrette at kaya itim ang buhok niya sa popular na serye sa telebisyon ay dahil pinatitina niya ang kanyang buhok sa nakalipas na 20 taon.
Sa kabila nito, talagang nagulat ang TV star nang humantong siya sa ospital sanhi na rin ng severe allergic reaction dahil sa tina.
“Nagmukha bang puffy ang aking ulo sa red carpet? Nagkaroon pala ako ng dangerous allergic reaction sa gina-gamit kong hair dye,” sinulat ni Perrette sa kanyang Twitter account. Nag-share ang 45-anyos na aktres ng larawan ng namamaga niyang mukha sa kanyang fans, “ito ako noong nasa ospital.”
Subalit hindi rin naman biglaan ang naging allergy ni Pauley. Sinabi niya sa KCAL9 nakaranas siya ng pangangati sa kanyang leeg at anit matapos na magtina may anim na buwan ang nakalipas—hindi niya nga lang pinansin ito.
Ayon kay Dr. Sejal Shah, isang New York-based cosmetic dermatologist, ang allergy ni Perrette ay maaaring nagmula sa para-phenylenediamine (PPD), isang sangkap na pangkaraniwang makikita sa itim na hair dye, mga temporary at black henna tattoo, at sa ilang mga damit na kulay itim.
Sinabi rin ni Shah na habang ang PPD ay isang potent sa kemikal sa permanent dye at semi-permanent dye, may iba pang mga sangkap na maaaring maging dahilan ng allergic reaction din.
Payo ni Shah kapag nagtitina sa sariling tahanan, i-check ang label ng gagami-ting hair dye para malaman ang PPD, m-Aminophenols, p-Aminophenols, toluene-2,5-diamine, at resorcinol—na kilalang mga irritant.
Kinalap ni Tracy Cabrera
