HATAW! D'yaryo ng Bayan hatawtabloid.com
IDINEPENSA ni Sen. Antonio Trillanes IV ang kanyang impormasyong inilabas na may nagbabalak ng kudeta laban sa Aquino administration.
Ayon kay Trillanes, kanyang nilinaw na noong tinanong siya kung mayroon bang mga heneral na mag-aaklas ay agad niya itong sinagot na may non-active generals ang nagre-recruit sa active officers ngunit hindi lang ito kinagat kaya hindi umusad.
Ayon kay Trillanes, dahil maganda ang moral at solid ang hanay ng mga sundalo sa ngayon kaya walang dahilan para kagatin ang pag-recruit ng mga retiradong heneral.
Inihayag ni Trillanes, hindi gawa-gawa lamang niya ang kwento dahil ang nakuha niyang impormasyon ay ipinasa na niya sa mga kinauukulan para beripikahin.
Bukod dito, may hawak siyang listahan ng mga pangalan ng mga heneral at ilang opisyal ng ibang ahensiya ng gobyerno na kasama sa nagpaplano ng kudeta ngunit hindi niya maaaring ilabas dahil bahagi ito ng intelligence information.
Sinabi rin ng senador na hindi pwedeng ipalabas ang listahan dahil baka iugnay sa ilang politiko.
(CYNTHIA MARTIN/
NIÑO ACLAN)
