Nanay tigbak sa bundol ng truck (4-anyos anak sugatan)

PATAY ang isang 43-anyos ginang habang sugatan ang kanyang anak nang mabundol ng isa sa dalawang truck na nagbanggaan kamakalawa ng hapon sa Valenzuela City.

Hindi na umabot nang buhay sa Valenzuela General Hospital ang biktimang si Ma. Luz Bayatan, 43, ng #22 Donesa St., Brgy. Canumay West ng nasabing lungsod, sanhi ng sugat sa ulo at pagkabali ng katawan.

Habang sugatan ang anak niyang si Gian Carlo, 4-anyos.

Nahaharap sa kasong reckless imprudence resulting in homicide at physical injuries in relation to Republic Act 7610 ang driver ng Isuzu Elf (REJ-7730) na si Joey Cos, 50, ng #50 Malolos Avenue, Bagong Barrio, Caloocan, at driver ng closed van na si Germando Castillo, 43, ng #100 Sauyo Road, Novaliches, Quezon City.

Sa ulat ng pulisya, dakong 1 p.m. nang maganap ang insidente sa kahabaan ng T. Santiago St. kanto ng F. Lazaro St., Brgy. Canumay West ng nasabing lungsod.

(ROMMEL SALES)