HATAW! D'yaryo ng Bayan hatawtabloid.com
BASAG ang bungo ng isang lola makaraan masapol ng rumaragasang motorsiklo habang tumatawid sa Caloocan City kamakalawa ng umaga.
Hindi na umabot nang buhay sa Dr. Jose N. Rodriguez Memorial Hospital ang biktimang si Alodia Uy, 78, ng Phase 7-B, Block 57, Lot 1, Brgy. 176, Bagong Silang ng nasabing lungsod, sanhi ng pinsala sa ulo at katawan.
Habang kusang loob na sumuko ang suspek na si Marianito Icaro, 37, ng Phase 1, Package 4 ng nasabing barangay.
Batay sa ulat ni PO3 Michael Calora, dakong 7 a.m. nang maganap ang insidente sa Kanlaon St., Brgy. 176.
Tumatawid ang biktima nang masapol ng rumaragasang Kawasaki Barako (5802-GF) na minamaneho ng suspek dahilan upang tumilapon si Uy at nabagok ng ulo.
Napag-alaman, hindi na nagsampa ng kaso ang mga kaanak ng biktima nang bayaran ng suspek ang lahat ng mga nagastos sa pagkamatay ni Uy.
(ROMMEL SALES)
