RIZAL – Tatlo ang sugatan makaraan makaladkad ng motorsiklo ng snatcher ang kanyang biktima at sumemplang ang nasabing sasakyan kamakalawa sa bayan ng Binangonan, lalawigan ng Rizal.
Kinilala ni Binangonan Police chief, ang biktimang sugatan na si Jenalyn Cenidoza, 23, may asawa, residente ng 1044 M. Oja Rd., Sitio Mambalon, Brgy. Mahabang, Parang ng nasabing bayan.
Sugatan din ang anak ni Cenidoza na si Marjun, 4-anyos, nang masubsob sa kalye dahil sa paghatak ng suspek na si Philip de Leon, 31, residente ng Brgy. Libis, sa shoulder bag ng ginang.
Sa ulat, naganap ang insidente dakong 10 p.m. sa National Road, Brgy. Mahabang Parang, Binangonan.
Naglalakad pauwi ang mag-ina nang biglang hablutin ng suspek na lulan ng motorsiklo, ang shoulder bag ng ginang.
Bagama’t nabigla ay hindi binitiwan ng ginang ang bag kaya siya ay nakaladkad at nawalan ng balanse ang motorsiklo at sumemplang.
Napansin ito ng mga bystander na hinabol at binugbog ang suspek bago dinala sa himpilan ng pulisya.
(MIKKO BAYLON)
