BILANG paghahanda sa pagbisita ni Pope Francis sa Enero 2015, nagsagawa ng inspeksyon ang mga taga-Vatican sa ilang lugar na posibleng bisitahin ng Santo Papa sa Visaya.
Kabilang sa ininspeksyon ang ilang lugar sa Tacloban at Palo, Leyte, mga lugar na matindi ang pananalasa ng Bagyong Yolanda noong Nobyembre 2013.
Pangungunahan ng Santo Papa ang blessing sa bagong Palo Cathedral.
Ayon kay Manila Archbishop Luis Antonio Cardinal Tagle, magiging mahigpit ang seguridad sa pagdating ni Pope Francis ngunit maaari pa rin siyang masilayan ng mga Katoliko.
Ayon kay Archibishop John Du, ng Archdiocese of Palo, mahalaga ang pagbisita ng Santo Papa sa mga Katolikong biktima ng supertyphoon dahil nagsisimbulo ito ng pag-asa sa ‘Yolanda’ survivors.
Una nang sinabi ng Catholic Bishops’ Conference of the Philippines (CBCP) na nakahanda na sila sa pagbisita ng Santo Papa sa Filipinas. (BCJ)
