NAGHIHINTAY ngayon ang Talk n Text kung sino ang makakalaban nito sa finals ng PBA Home Tvolution Commissioner’s Cup.
Pagkatapos na walisin nito ang Rain or Shine sa loob lang ng tatlong laro sa semifinals, lalong napalapit ang tropa ni coach Norman Black sa titulo.
Labing tatlong sunod na panalo na ang naitala ng TNT sa torneo at kung wawalisin nila ang finals, sila ang magiging unang koponan sa kasaysayan ng PBA na nagkampeon na walang talo.
Sumandal ang TNT sa kanilang 14 na naisalpak na tres upang putulin ang mga rally ng Rain or Shine.
Nanguna sa opensa ng TNT si Ryan Reyes na nagtala ng limang tres tungo sa 15 puntos.
“My teammates gave me an opportunity to get open so I just took the shots,” ani Reyes na dating Rookie of the Year sa PBA noong 2008. “We just got the opportunities to get open because of the kickouts, as coach Norman has advised us. Everyone is healthy and we got a good rest after we got knocked out last conference. We’re a hungry team and it’s nice to be back in the finals.”
(James Ty III)
