Guiao tanggap ang pagkatalo

KAHIT kilala si Rain or Shine coach Yeng Guiao bilang mainitin ng ulo sa loob ng court, inamin niya na talagang mas malakas ang Talk n Text sa katatapos nilang duwelo sa semifinals ng PBA Commissioner’s Cup.

Tatlong sunod na laro lang ang kinailangan ng Tropang Texters upang talunin ang Elasto Painters upang umabante sa finals.

Para kay Guiao, malaking kawalan sa kanyang koponan ang ilang mga manlalarong napilay tulad nina Paul Lee, Jervy Cruz, Chris Tiu, Ryan Arana at Wayne Chism.

Nagtala si Chism ng 31 puntos sa Game 3 ngunit halatang mabagal ang kanyang kilos samantalang anim na minuto lang ang nilaro ni Lee.

“We actually had a chance kahit torrid ang three-point shooting nila. I guess it was the desire of my players to keep fighting,” wika ni Guiao. “But umulan ulit ng tres (ang TNT). There are nights like that at ganoon talaga ang basketball. TNT is playing the best basketball right now.”

Apat na araw  lang ang magiging pahinga ng Rain or Shine at sa darating na Miyerkoles na babalik ang Painters sa ensayo dahil magbubukas ang Governors’ Cup kaagad pagkatapos ng finals ng Commissioner’s Cup.

Katunayan, kinompirma ni Guiao na babalik si Arizona Reid bilang import ng ROS sa third conference.

(James Ty III)