HATAW! D'yaryo ng Bayan hatawtabloid.com
MUKHANG mayroong pangangailangan na panghimasukan ng Department of Trade and Industry (DTI) at Bureau of Internal Revenue (BIR) ang mga promo-raffle ng Solaire Casino.
Mayroon kasing isinagawang HK$1.5M (PHP10M) Baccarat tournament ang Solaire Casino noong unang linggo ng Marso para sa mga VIP Player.
Heto ngayon ang siste, sa Bacarrat tourney elimination round pa lang, marami na ang umaangal.
Napansin kasi nila na hindi basta VIP players ang naglalaro, mayroon ilang kasali na Casino financiers, kapatid ng isang Solaire official at junket operators.
‘E dapat pala tournament ng mga financiers at Kamaganak Inc., na lang ‘yan!?
Ang ipinagtataka pa ng mga player, pagdating sa final table, mayroon biglang mga dumarating at nakasali na hindi dumaan sa elimination round.
SONABAGAN!!!
Hindi ba malaking pandaraya ito sa VIP players!?
Heto pa ang isang siste, d’yan sa Solaire Casino, kapag may promo raffle sila, at ang premyo halimbawa ay kotse ‘e hindi lubos na masisiyahan ‘yung nanalo.
Bakit kan’yo!?
‘E kasi, babayaran pa no’ng nanalo ‘yung 20/30 porsiyentong tax, base sa halaga ng kotse. Wala naman ibinibigay na resibo sa nanalo na katunayan na ibinayad nila sa BIR ang tax na ibinabawas nila. Aabutin pa ng halos isang buwan bago ma-claim ang napanalunan na kotse?!
Kung sakali namang iko-convert ng nanalo sa cash ang kotse, babawasan naman nila ng 30 porsiyento ang kabuuang halaga at kung gusto naman na buong halaga ang makuha ay PLASTIC FREE PLAY CHIPS naman ang ibibigay nila.
‘E bakit nagpa-raffle pa kayo kung gusto pa n’yong pagkakitaan ‘yan!?
Sonabagan!!! Style Kastilang swapang!!!
‘E anong klase panalo ‘yan?!
Playing chips para ilaro at ipatalo ulit sa Casino nila?!
Trade and Industry Secretary Gregory Domingo, Sir, bakit nakalulusot sa inyo ang mga ganyang klaseng promo?
Aba, bakit WALA man lang tayong nakikitang representative ng DTI kapag nagra-raffle ang Solaire Casino.
May sanction o aprubado ba ng DTI ang ganyan raffle promo nila!?
Ang nalalaman na lang agad ng publiko ‘e may NANALO na.
Commissioner KIM HENARES, totoo naman bang napupunta sa BIR ang ibinabawas na 20-30 porsiyento tax sa mga nanalo?!
O sa bulsa lang nila napupunta ang tax na kinakaltas ng Solaire?
Paki-EXPLAIN!
YAKUZA STYLE TERRORISM SA MISS U CLUB SA PASAY CITY, NAKAAALARMA NA!
(ATTN: NCRPO CHIEF GEN. CARMELO VALMORIA)
ALAM kaya ni PNP-NCRPO chief, Gen. Carmelo Valmoria na mayroong isang grupo ng mga ‘hoodlum’ na namamayagpag ngayon sa Pasay City, at inaagaw ang KTV/club sa mga kasalukuyang operator?!
Kung tawagin daw ang grupo na tila Yakuza Gang sa paghahasik ng terorismo sa mga KTV/club ay Ex-Konsuhol ‘este’ konsi Bul ‘ol.
(Take note: hindi po ‘yung si Bul ‘ol na Ifugao Rice God).
Gaya na lang po ng isang club (MS. U) na matagal nang ipinasara mismo ni Vice President Jejomar Binay dahil sa malalang paglabag sa human trafficking at nahulihan pa ng guest relations officer (GRO) na menor de edad.
Nagbukas na naman po ang nasabing KTV/club at ang management/financier ay isang Japanese national.
Simpleng-simple lang ang sytle ng grupong Ex-Konsi Bul ‘ol. Mayroon silang mga gwardiya at goons sakay ng isang pick-up na sapilitang pumapasok sa mga KTV/club na gusto nilang i-takeover.
Ang dala ng kanilang mga gwardiya at goons at baseball bat, baril at iba pang armas.
Kamakalawa ng gabi, ipinagmalaki ng grupo nina Ex-Konsi Bul ‘ol na tumosgas sila ng P300,000 para ipanghatag sa Pasay police.
Take note: PNP Pasay Chief Kernel Ortilla, nasasabit ang opisina mo sa usapin ng Ms. U Club!
Tapatan na lang daw ang TOSGAS nila kung gustong maibalik ang operation ng grupo sa dating management.
Kaya nang pasukin nila ang nasabing KTV/club, pinagwawasak nila ang mga gamit, kinulimbat ang P700K revolving fund sa safety vault mismo ‘e walang nagrespondeng pulis.
Ayon sa ating source, KASABWAT ng grupo ni Ex-Con Bul ‘ol ang isang alyas Bernard Golden at Japanese fugitive na si AKIBA sa panloloko sa Japanese investors.
Umaatungal pa nga raw sa kaiiyak hanggang ngayon ang isang Jack Ramos at Mr. Suzuki na kabilang sa mga naloko ng grupo nina Ex-Con Bul ‘ol at Akiba.
NCRPO chief, Gen. Valmoria Sir, meron ka pa bang pulis sa Pasay City?!
Nai-report na ba sa inyo ang insidenteng ‘yan nitong nakaraang Sabado ng gabi?
Paki-check na nga po at baka nagtayo na ng sariling POLICE HEADQUARTERS ang grupo nina Ex-Con Bul ‘ol at Akiba?!
Check-check rin po kapag may time!
MTPB ACTING DIRECTOR CARTER DON LOGICA SANDAMAKMAK ANG GHOST EMPLOYEES?
(PAGING: COA)
MANANG-MANA raw sa kanyang bossing ang isang Carter Don Logica.
Mayroon kasing nagreklamo kay Manila City Administrator, Atty. Simeon Garcia, Jr., na nakabistong ang tanggapan ni Logica ay may pinasasahod na ghost employees.
Kabilang umano sa ghost employees na ito ang asawa ng sekyu ni Logica na si Judith Domingo, isang Sharmayne Macorol, Alez Nasol, Mary Grace Pancho, kapatid ng isang alayas Kendi na secretary umano ni Logica, isang Rowena Salonga at isang Deborah Talusan.
Ang nasabing multo ‘este’ ghost employees sa tanggapan ni Logica ay nasa ilalim ng pangangasiwa ng isang Toti Diokno na ang trabaho ay naka-pokus umano sa mga pilahan at tarahan ng dyip.
Habang sa north impounding area ay nariyan naman ang isang regular na empleyado na isang Tony Punsal, na ang trabaho ay mag-isyu ng sariling sticker sa mga sasakyang tatlo ang gulong para hindi sila makompiskahan ng sasakyan.
Tsk tsk tsk …
Napakahusay pala ni Carpenter ‘este’ Carter ng MTPB … nakakapag-alaga ng ‘multo’ este ghost employees?!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
