Maraming karerista ang pinahanga ng bagong mananakbo mula sa kuwadra ni Ginoong Joey Dyhengco na si Skyway na sinakyan ni jockey Mark Angelo Alvarez sa naganap na “PCSO Maiden Race” nitong nagdaang Sabado sa pista ng Sta. Ana Park.
Sa largahan ay mabilis na umarangkada sa harapan sina Mark at bumuntot agad ang kalaban nilang si Tap Dance ni Jessie Guce. Pagdating sa may medyo milya ay magkalapit na naglaban sa banderahan sina Skyway at Tap Dance, habang nasa tersera puwesto si Great Care ni Jordan Cordova.
Pagpasok sa ultimo kuwarto ay nasa unahan pa rin si Skyway habang nakapirmis pa sa ibabaw si Mark, habang ang kasunod na si Jessie Guce ay hinihingan na ang dala niyang si Tap Dance. Pagsungaw sa rektahan ay kumalas na sa bandera at lumayo na si Skyway ng may mga limang kabayong layo laban kay Tap Dance hanggang sa makarating sa meta na marami pang ibubuga.
Pumangalawa sa datingan si Tap Dance, tersero si Great Care pang-apat si Sweetchildof mine at panglima o huli si Magical Bell. Naorasan ang tampok na takbuhan ng mabilis na 1:12.2 (25.0-22.5-25.0) para sa 1,200 meters na distansiya.
Sa naitala niyang pruweba ay marami na kaagad ang umaasa sa kanya na maging kampeon para sa grupo ng mga Juvenile
Fred Magno